बिना कसुर पाँच वर्ष जेल

२८ नोभेम्बर २०१५, काठमाडौं – सरकारी छानबिन समितिको गलत प्रतिवेदनका भर परेर मुद्दा चलाउँदा एकजना व्यक्ति अनाहकमा पाँच वर्ष जेल बस्नुपरेको छ । गलत प्रतिवेदनलाई आधार मानेर सरकारले ती व्यक्तिविरुद्द ठगी, राजस्व चुहावट, बिनाइजाजत वित्तीय कारोबार गरेकोलगायत अभियोगमा एक दर्जन मुद्दा चलाएको छ । तेह्रथुम मोराहाङका विश्वनाथ गौतम यसरी बित्थैमा थुनिएका हुन् । उनी ०६८ असार २१ गतेदेखि नक्खु कारागारमा छन् ।

अदालतको फैसलापछि प्रतिवेदनले गौतमका विषयमा गलत तथ्य औंल्याएको खुलेको छ । राजस्व अनुसन्धान विभागका उपमहानिर्देशक राममणि दुवाडीको संयोजकत्वमा सरकारद्वारा गठित युनिटी लाइफ इन्टरनेसनलका संस्थापक सञ्चालक सदस्य भनेर दोषी करार गर्दै कारबाहीको सिफारिस गरेको थियो । कम्पनी रजिष्टारको कार्यालयले विश्वनाथ गौतम नामको व्यक्ति कहिल्यै युनिटी सञ्चालक सदस्य नरहेको भन्दै गृह मन्त्रालयमा परिपत्र गरेको छ । अदालतबाट जेल सजाय समेत भएर थुनामा गएपछि गौतम कर्मचारीको हैसियतमा ६ महिनामात्र काम गरेको तथ्य खुलेको छ, आजको अन्नपूर्ण पोस्ट दैनिकमा खबर छ ।