१५ फागुन २०७१, काठमाडौं –एक साता अघि राजधानीको बसन्तपुरमा रेहेको ‘ए प्लस’ ट्युसन सेन्टरमा भएको एसिड आक्रमणमा घाईते भएका तिन किशोरी मध्येकी एक हेमु श्रेष्ठ उपचार पछि घर फर्किसकेकी छिन् । एसिड आक्रमणबाट गम्भिर घाईते भएकी संगीता पुलामी र सीमा बस्नेतमाथि एसिड आक्रमण हुँदा सँगै रहेकी हेमुको मुहारमा पनि एसिडको छिटा परेको थियो । एसिड आक्रमण भएको पाँच दिनपछि हेमुले यसरी सम्झिइन् त्यस दिनको घटना:
हामीमाथि एसिड प्रहार भएको घट्ना आइतबारको हो । म करिब दुई साता देखि त्यस ट्युसन सेन्टरमा पढ्न थालेको थिएँ । अर्की साथी संगीता भने एक बर्ष देखि त्यहिँ पढ्दै आएकी थिइन् । म शुक्रवार पढ्न गएको थिइन्,शनिवार बिदा थियो, आइतवार जाँदा त्यस्तो घटना भोग्नु प¥यो ।
हाम्रो ग्रुपमा विज्ञानको ट्युसन पढ्ने छ जना साथी थिए तर हामी तीन जना भने गणित पनि पढ्थ्यौं । त्यस दिन विज्ञान पढ्ने साथीहरु कोही आएका थिएनन्, हामी गणित पढ्ने तीन जना मात्रै जम्मा भयौं । हामीलाई गणित पढाउने नविन सरले सीमासँग नआउने कुरा गर्नु भएको रहेछ,तर म अघिल्लो दिन नगएकाले थाहै भएन् । ‘मलाई यो थाहा छैन कि अरु ६ जना साथी किन आएनन्,शायद विज्ञान पढाउने सरले पनि नआउने कुरा गर्नुभएको थियो कि, थाहा छैन । शुक्रवार नआएकोले नवीन सरले मलाई नआउनु भनेर खवर गर्नुभएको थिएन् अरु साथीले पनि भनेनन् । कताबाट कसरी भन्नु सम्भवै भएन ।
ट्युसन सेन्टरमा हामी तीनमध्ये सबैभन्दा नयाँ सीमा थिइन्, किनकी उनी त्यहाँ पढ्न थालेको करिब एक साता मात्र भएको थियो । हामी तीन जनाको भेट संयोग मात्र थियो ‘मिल्ने साथी वा ब्वाईफ्रेन्ड बनाएका सहपाठीको कारण त्यसदिन हाम्रो भेट भएको पटक्कै हैन ।’
ट्युशन सेन्टरमा म पुग्नासाथ संगीताले मलाई भनिन् ‘अकाउन्टको जर्नल भौचर मिलाउनै सकिँन,तिमीलाई आउँछ भने सिकाइदेउ न ।’ अनि हामी दुई बैनी मिलेर जर्नल भौचर ट्राई गर्दै थियौं,त्यतिकैमा सीमा आइपुगिन् । त्यसपछि हामी तिनैजना मिलेर जर्नल भौचरको हिसाब गरिरहेको थियौं । हामी हिसाब गरिरहँदा उनीहरु ढोका नजिकै सेकेण्ड बेन्चमा थिए, अनि म चाँहि ब्ल्याक बोर्ड नजिकै थिएँ ।
त्यतिकैमा एक्कासी आएर एउटा मान्छेले ढोका खोलेर सिसिको बोतल फ्याँक्यो । त्यो सिसिको बोतल फ्याँक्नासाथ संगीताको र सीमाको मुखभरि पर्यो, मलाई छिर्काले भेट्यो केही दिनको उपचारपछि निको भयो तर दाग अझै मेटिएको छैन । सिसीको तरल पदार्थ हाम्रो मुखमा पर्नासाथ पोल्न थाल्यो । अनि हामीलाई थाहा भयो कि यो त एसिड पो रहेछ । हामीले एसिडको बारे विज्ञानमा पढेका थियौं ।
एसिड मुखमा पर्नासाथ उनीहरु दुवै जना चिच्याएर मुख छोप्दै भागें, अनि म पनि उनीहरुसँगै भागें । ट्युशन सेन्टरको अलिपर एउटा टेलर्समा गयौं, संगीता र सीमा दुवै जना चिच्याइरहेका थिए । उनीहरु आफैंले पानी हाल्दिनु, पानी चाहियो, हस्पिटल लानु भन्दै चिच्याइरहेका थिए । केहीवेरमा सीमालाई उनका आफन्त आएर लिएर गए । म र संगीता उनको घरमा गयौं । घर पुगेपछि संगीतालाई उपचारका लागि वीर अस्पताल लैजाने कुरा भयो, अनि म पनि संगीता सँगै वीर अस्पताल गएँ । हामीमाीथ एसिड हान्ने दुष्ट आजसम्म पक्राउ परेको छैन,त्यो अपराधीलाई छिटो भन्दा छिटो समातेर कडा कारवाहीका लागी सरकारलाई अनुरोध गर्दछु ।
(सुजन पन्तसँगको कुराकानीमा आधारित) source:ratopati
No comments :
Post a Comment