गमला फुटाउनेलाई २ हजार जरिवाना

१७ मंसिर २०७१, काठमाडौं— सार्क सम्मेलनका क्रममा भृकुटीमण्डपको सडकका दायाँबायाँ राखिएको गमला विद्यार्थीहरुको झगडाका कारण फुटेको छ । केटी जिस्काएको निहुँमा रत्नराज्यलक्ष्मी क्याम्पस र त्रिचन्द्र क्याम्पसका विद्यार्थीको झगडा हुँदा सोमबार सडकका दुई वटा गमला फुटेका हुन्। त्रिचन्द्र क्याम्पसबाट आएका विद्यार्थीले सोमबार रतनराज्यमा पढ्दै गरेका पुस्कर बास्तोला, राजन घिमिरे र विकास अधिकारीमाथि हातपात गरेको रत्नराज्य क्याम्पसका स्ववियु सभापति राजकुमार राईले बताए । उनका अनुसार त्रिचन्द्रका विद्यार्थीको आक्रमणका कारण तीनै जना सामान्य घाइते भए भने सडकमा राखिएको गमला फुट्न पुग्यो ।

फुटेको गमला प्रहरीले लगेको छ । काठमाडौं महानगरपालिकाले उक्त स्थानमा अर्को गमला राख्ने र गमला फुटाउनेलाई प्रहरीको सहयोगमा २ हजारसम्म जरिवाना तिराउने तयारी गरेको छ । महानगरपालिकाका अनुसार हालसम्म सडकमा राखिएका चार वटा गमला फुटेका छन् । तीमध्ये कालिमाटीमा गमला फुटाउने एक जनालाई दुई हजार जरिवाना तिराइसकिएको छ ।